Pergunta no Sujestaun
Se karik ita-boot sira hakarak hatene liu tan kona-ba Timor Translation- Tradusaun Timor, ka hakarak hatene oinsá ami konsege halo website ne’e, ha’u halo dokumentu ida-ne’e para hotu-hotu bele hetan klarifikasaun. Se karik iha pergunta ruma ne’ebé iha ne’e laiha, halo favor kontaktu ba ami.
Imi atu fo servisu ba ema Timor-oan ka la’e?
Infelizmente ami labele oferese ida-ne’e, tanba ami mos foin mak harii no laiha kapasidade agora atu halo ida-ne’e.
Maibe hanesan ne’e imi rasik halo servisu no la ajuda tradutór Timor-oan sira. Ne’e loos ka la’e?
Ne’e la loos. Realidade iha Timor falta kapasidade nasionál rekursu umanu iha area hotu-hotu, tan ne’e, estranjeiru tama iha pozisaun sira-ne’e. Iha setór tradusaun mós hanesan. Dala barak ONG, Governu ka kompanha sira la konsege hetan tradutór ne’ebé bele halo servisu ne’e, sira presiza husu ba tradutor estranjeiru sira. Dala ruma mos sira presiza urjente, no la iha ema ne’ebé bele halo lailais, tanba la iha tempu. Ami dala barak tama iha servisu bainhira la iha ema seluk atu halo. Tan ne’e, importante duni atu dezenvolve lingua ofisiál, Tetun.
Oinsá tradutor internasionál ajuda Timor?
Ha’u sente prazer boot liu servisu iha area tradusaun no durubasa, tanba ha’u gosta ajuda ema ne’ebé ko’alia lingua diferente, atu sira bele komprende malu. Ha’u hanoin dever ne’e importante iha nasaun ida ne’ebé sei iha prosesu dezenvolvementu hanesan Timor. Iha ha’u-nia esperiensia, ha’u tradus dokumentu hanesan manual treinamentu, dokumentu ofisiál Governu-nian, karta ofisiál importante, no mós ha’u iha hónera sai durubasa ba treinamentu iha area agrikultura, saude, direitus umanus, nsst. Husi esperiénsia ne’e ema barak konsege komprende malu maski ko’alia lian ne’ebé la hanesan. Ha’u sente orgullu katak ha’u bele ajuda iha aspeitu ida-ne’e.
Saida mak imi bele halo hodi tulun Timor-oan sira?
Primeiru, ami hakarak hatudu ezemplu ba Timor-oan sira. Bele halo website furak no promosaun di’ak, la dificíl no la gasta osan barak. Tan ne’e, amu halo website tomak iha Ingles no mós Tetun hodi sai mós rekursu ida ba ema Timor-oan sira. Ita-boot sira interese karik ha’u bele ko’alia uituan kona-ba softwár ha’u uza. WordPress maka softwár gratis, ita-boot sira mós bele halo website hanesan ha’u-nian. Ha’u fiar ba imi, imi mós bele!
Imi prontu atu hetan sujestaun hosi ema ka la’e?
Sin, ami prontu hela de’it! Ami foin mak harii, no hein katak ita-boot sira bele fo ami sujestaun di’ak oinsá ami bele hadi’ak ami-nia servisu, no oinsá ami bele ajuda tradutór Timor-oan sira. Ami konvida tradutór sira ne’ebé iha pergunta ruma kona-ba servisu independente/ aspeitu ruma husi tradusaun bele kontaktu ba ami, ami sei sempre responde imi-nia pergunta sira. Ami husu obrigadu ba komentáriu hotu-hotu.
Mandy no Megan
